அமெரிக்காவில் உலக வர்த்தக மையம் மீதான 9/11 பயங்கரவாதத் தாக்குதல் நடைபெற்று கால் நூற்றாண்டு (25 ஆண்டுகள்) நிறைவடையவுள்ள நிலையில், அத்தாக்குதலின் போது இரட்டைக் கோபுரத்திலிருந்து கீழே குதித்த நபரின் வரலாற்றுச் சிறப்புமிக்க ‘ஃபாலிங் மேன்’ (Falling Man) புகைப்படத்தின் பின்னணியில் உள்ள சோகத்தையும் உண்மையையும் அவரது சகோதரி மனம் திறந்து பகிர்ந்துள்ளார்.
கடந்த 2001 செப்டம்பர் 11 அன்று அசோசியேட்டட் பிரஸ் (AP) புகைப்படக் கலைஞர் ரிச்சர்ட் ட்ரூவால் எடுக்கப்பட்ட அந்தப் புகைப்படம், உலக வர்த்தக மையத்தின் வடக்குக் கோபுரத்தின் 106-வது மாடியிலிருந்து தலைகீழாகக் கீழே விழும் ஒரு நபரைக் படம்பிடித்திருந்தது. ‘ஃபாலிங் மேன்’ என்று உலகளவில் புகழ்பெற்ற அந்த நபரின் அடையாளம் அதிகாரப்பூர்வமாக உறுதி செய்யப்படாத போதிலும், அவர் ‘விண்டோஸ் ஆன் தி வேர்ல்ட்’ உணவகத்தில் ஒலிப் பொறியாளராகப் பணியாற்றிய 43 வயதான ஜோனதன் பிரைலி (Jonathan Briley) தான் எனப் பல்வேறு ஆதாரங்களின் அடிப்படையில் நம்பப்படுகிறது.
தாக்குதல் நடந்து 25 ஆண்டுகள் கடந்துள்ள சூழலில், ஜோனதனின் சகோதரியான குவென் பிரைலி-ஸ்ட்ராண்ட் (Gwen Briley-Strand) அளித்துள்ள பேட்டியில், “அந்தப் புகைப்படத்தை என்னால் இன்னும் நேரடியாகப் பார்க்க முடிவதில்லை; அது எங்கள் குடும்பத்திற்கும் உலகிற்கும் ஆறாத வடுவை ஏற்படுத்திய ஒன்று” எனத் தெரிவித்துள்ளார். “கீழே விழுந்தவர்கள் தற்கொலை செய்துகொண்டதாகச் சிலர் தவறாகக் கருதுகிறார்கள்; ஆனால், அவர்கள் தப்பிக்க வழியின்றி உந்தப்பட்ட பாவமற்ற ஆன்மாக்கள், அவர்களைக் கடவுள் ஏற்றுக்கொண்டிருப்பார் என நான் நம்புகிறேன்” என்றும் அவர் உருக்கமாகக் குறிப்பிட்டுள்ளார்.
அக்காலத்தில் பத்திரிகைகளில் வெளியான போது கடும் விமர்சனங்களையும் சர்ச்சைகளையும் சந்தித்த இந்தப் புகைப்படம், பயங்கரவாதத் தாக்குதலின் கொடூரத்தையும், அன்றைய தினம் உயிரிழந்த சுமார் 3,000 மனிதர்களின் கடைசி நிமிட வலிக்கும் சாட்சியமாக மாறியுள்ளது. 25 ஆண்டுகள் கடந்த பின்னரும், அந்த ஒரு நிழற்படத்தின் பின்னால் புதைந்துள்ள குடும்பத்தின் கண்ணீரும் இழப்பும் சர்வதேச அளவில் மீண்டும் பெரும் கவனத்தையும் அனுதாபத்தையும் பெற்றுள்ளது.
