கோடைகால வெப்ப அலையில் சிக்கித் தவிக்கும் பிரிட்டன்: குடிநீர் பற்றாக்குறையால் மக்கள் அவதி!

பிரிட்டன் (UK) வரலாறுகாணாத வகையில் வசந்த காலத்திலேயே கடுமையான வெப்ப அலையின் (Heatwave) பிடியில் சிக்கித் தவித்து வருகிறது. நாட்டின் வெப்பநிலை இதுவரை இல்லாத புதிய உச்சமாக 34.8 டிகிரி செல்சியஸைக் கடந்து பதிவாகியுள்ளதால், ஒட்டுமொத்த பிரிட்டனின் உள்கட்டமைப்பும் முடங்கும் அபாயத்தை எதிர்கொண்டுள்ளது. இந்தத் திடீர் தட்பவெப்ப நிலை மாற்றம் காரணமாக, லண்டன் உள்ளிட்ட முக்கிய நகரங்களில் உள்ள பொதுப் போக்குவரத்து அமைப்புகள், அலுவலகங்கள் மற்றும் அத்தியாவசியச் சேவைகள் அனைத்தும் கடுமையாகப் பாதிக்கப்பட்டு, மக்களின் இயல்பு வாழ்க்கை முற்றிலுமாக முடக்கப்பட்டுள்ளது.

குறிப்பாக, இந்த அசாதாரண வெப்பம் பிரிட்டனின் ரயில் போக்குவரத்துத் துறையைப் பெரும் குழப்பத்தில் ஆழ்த்தியுள்ளது. அதீத வெப்பத்தின் காரணமாக ரயில் தண்டவாளங்கள் மற்றும் மின்சார கம்பிகள் விரிவடைந்து (Buckling) விபத்துக்கள் ஏற்படும் அபாயம் ஏற்பட்டுள்ளதால், நெட்வொர்க் ரயில் (Network Rail) நிறுவனம் பல வழிகளில் ரயில்களின் வேகத்தைக் கணிசமாகக் குறைத்துள்ளதுடன், நூற்றுக்கணக்கான ரயில் சேவைகளை முழுமையாக ரத்து செய்துள்ளது. லண்டனின் பரபரப்பான வாட்டர்லூ (London Waterloo) ரயில் நிலையப் பாதைகளில் ஏற்பட்ட புகை மூட்டம் காரணமாகப் பயணிகள் பல மணி நேரம் நிலையங்களிலேயே தவித்து நின்றனர்.

மறுபுறம், ஏர் கண்டிஷனர் (AC) வசதிகள் இல்லாத பழைய உள்கட்டமைப்பைக் கொண்ட லண்டன் சுரங்கப்பாதைகளில் (Subway) பயணிகள் வெயிலின் தாக்கத்தால் மூச்சுத்திணறலுக்கு ஆளாகினர் . இதன் காரணமாக, பெருநிறுவனங்கள் தங்களின் ஊழியர்களைப் பாதுகாக்கும் பொருட்டு, அலுவலகங்களை மூடிவிட்டுப் பணியாளர்களை வீட்டிலிருந்தே வேலை செய்யுமாறு (Work from Home) அவசரமாகத் திருப்பி அனுப்பி வருகின்றன. மேலும், வெப்பத்தின் தீவிரத்தால் பிரிட்டனின் பல்வேறு நீர்நிலைகளில் மக்கள் குளிக்கச் சென்ற போது, எதிர்பாராத விதமாக நீரில் மூழ்கிச் சிலர் உயிரிழந்துள்ள சோகமும் அரங்கேறியுள்ளது .

வெப்ப அலையின் உச்சகட்டமாக, பிரிட்டனின் பல பகுதிகளில் குடிநீர் விநியோகம் முற்றிலும் பாதிக்கப்பட்டுத் தண்ணீர் குழாய்கள் வறண்டு போயுள்ளன. பொதுமக்கள் தங்களின் தோட்டங்களுக்குத் தண்ணீர் ஊற்றுவதையும், குழந்தைகள் விளையாடும் சிறிய ரப்பர் நீச்சல் தொட்டிகளில் (Paddling Pools) தண்ணீரை நிரப்புவதையும் உடனடியாகத் தவிர்க்க வேண்டும் என்று தெற்கு வெஸ்ட் வாட்டர் (South West Water) உள்ளிட்ட குடிநீர் விநியோக நிறுவனங்கள் வாடிக்கையாளர்களுக்குக் கடுமையான கட்டுப்பாடுகளை விதித்துள்ளன . முன்னெச்சரிக்கையின்றி தண்ணீர் விநியோகத்தைக் கட்டுப்படுத்தும் நிறுவனங்களின் இந்தத் தன்னிச்சையான நடவடிக்கைக்குப் பிரிட்டன் பொதுமக்கள் மத்தியில் தற்போது கடும் எதிர்ப்பு கிளம்பியுள்ளது.