இந்திய கம்யூனிஸ்ட் கட்சியின் (CPI) மூத்த தலைவர்களில் ஒருவரான சி. மகேந்திரன், தனது 50 ஆண்டுகால கம்யூனிஸ்ட் அரசியல் பயணத்தை முடிவுக்குக் கொண்டு வந்து, ஆளும் தமிழக வெற்றிக் கழகம் (தவெக) கட்சியில் நேற்று (ஜூன் 18, 2026) அதிகாரப்பூர்வமாக இணைந்தார். பனையூரில் உள்ள தவெக தலைமை அலுவலகத்தில் பொதுச்செயலாளர் புஸ்ஸி ஆனந்த் முன்னிலையில் அவர் கட்சியில் இணைந்த சில மணி நேரங்களிலேயே, சி. மகேந்திரனின் கடந்த காலச் செயல்பாடுகள் மற்றும் அவர் மீதான ஒழுங்கு நடவடிக்கைகள் குறித்த அதிர்ச்சிகரமான பின்னணித் தகவல்களை இந்திய கம்யூனிஸ்ட் கட்சியின் தலைமை பொதுவெளியில் போட்டுடைத்துள்ளது.
சிபிஐ தலைமை வெளியிட்டுள்ள அறிக்கையின்படி, சி. மகேந்திரன் கடந்த காலங்களில் கட்சியின் கொள்கைகளுக்கும் விதிகளுக்கும் முரணாகச் செயல்பட்டதாகக் குற்றம் சாட்டப்பட்டுள்ளது. குறிப்பாக, கடந்த 2022-2023 காலகட்டத்தில் கட்சியின் அதிகாரப்பூர்வமற்ற, ஆனால் மிக முக்கிய பதிப்பக நிறுவனமான ‘நியூ செஞ்சுரி புக் ஹவுஸ்’ (NCBH) உரிமையை கட்சித் தலைமைக்குத் தெரியாமல் ரகசியமாகத் தன்வசப்படுத்த முறைகேடான வழிகளில் முயன்ற விவகாரத்தில் சி. மகேந்திரன் தான் முக்கிய மூளையாகச் செயல்பட்டுள்ளார் என்று கம்யூனிஸ்ட் கட்சி பகிரங்கமாகத் தெரிவித்துள்ளது.
இந்த முறைகேட்டின் போது, பதிப்பக நிறுவனத்தின் தலைவராக இருந்த கட்சியின் மிக மூத்த மற்றும் மதிப்பிற்குரிய தலைவரான நல்லகண்ணு மற்றும் நிறுவனத்தின் இயக்குநர்களில் ஒருவரான மறைந்த தா. பாண்டியன் ஆகியோரை ஏமாற்றி, அவர்களிடம் உண்மை நிலையை மறைத்து சி. மகேந்திரன் ரகசியமாகக் கையெழுத்து வாங்கியதாகக் குற்றம் சாட்டப்பட்டுள்ளது. அப்போதைய மேலாண்மை இயக்குநர் சண்முகம் சரவணனுடன் கூட்டுச் சேர்ந்து கொண்டு, மோசடிப் பேர்வழிகளுக்குச் சாதகமாகச் செயல்பட்டு நிறுவனத்தின் மொத்த அதிகாரத்தையும் கைப்பற்ற முயன்றதால், கடந்த 2023-ம் ஆண்டு நடைபெற்ற கட்சியின் மாநிலக் குழுக் கூட்டத்தில் சி. மகேந்திரனின் அனைத்துத் தேர்ந்தெடுக்கப்பட்ட பொறுப்புகளும் பறிக்கப்பட்டு, அடிப்படை உறுப்பினராக அவர் தரம் குறைக்கப்பட்டார் என்ற உட்கட்சி விவகாரத்தை சிபிஐ தற்போது அம்பலப்படுத்தியுள்ளது.
கட்சியின் நற்பெயருக்கும், மூத்த தலைவர்களின் பெயருக்கும் களங்கம் ஏற்பட்டுவிடக் கூடாது என்பதற்காகவே இதுவரை காவல் நிலையத்தில் புகார் அளிக்காமல் கட்சிக்குள் ஒழுங்கு நடவடிக்கை எடுக்கப்பட்டதாகக் குறிப்பிட்டுள்ள சிபிஐ, கடந்த 4 ஆண்டுகளாக அவர் எந்தவொரு மக்கள் பணிகளிலும் ஈடுபடாமல் முற்றிலும் ஒதுங்கியே இருந்தார் என்றும் விமர்சித்துள்ளது. இதற்கிடையே தவெகவில் இணைந்தது குறித்துப் பேசிய சி. மகேந்திரன், “அங்கு நிலவிய உட்கட்சிச் சூழல் காரணமாகவே விலகினேன்; தவெகவின் ஊழல் ஒழிப்பு மற்றும் மது ஒழிப்பு போன்ற உயரிய கொள்கைகளுடன் இணைந்து தொடர்ந்து பாடுபடுவேன்” என்றும், தன் உடலில் எப்போதும் கம்யூனிசத்தின் அடையாளமான சிவப்புத் துண்டு இருக்கும் என்றும் விளக்கம் அளித்துள்ளார்.
