தமிழக துணை முதல்வர் உதயநிதி ஸ்டாலினின் மகனும், ரெட் ஜெயண்ட் மூவிஸ் நிறுவனத்தின் முக்கியப் பொறுப்பில் இருப்பவருமான இன்பநிதி, நடுக்கடலில் அலைச்சறுக்கு (Surfing) பயிற்சி செய்யும் மாஸான புகைப்படங்கள் மற்றும் வீடியோக்களைத் தனது இன்ஸ்டாகிராம் பக்கத்தில் பகிர்ந்துள்ளார். இந்த அலைச்சறுக்கு பதிவுகள் தற்போது சமூக வலைத்தளங்களில் வைரலாகி ரசிகர்களின் கவனத்தை ஈர்த்து வருகின்றன.
பிரிட்டனில் உள்ள லீட்ஸ் பெக்கெட் பல்கலைக்கழகத்தில் ‘ஸ்போர்ட்ஸ் டெவலப்மென்ட்’ (Sports Development) பிரிவில் உயர் கல்வி முடித்துள்ள இன்பநிதி, விளையாட்டுத் துறையில் மிகுந்த ஆர்வம் கொண்டவராக விளங்கி வருகிறார். இந்நிலையில், கடலின் சீற்றமான அலைகளுக்கு இடையே மிகவும் லாவகமாகச் சர்பிங் போர்டில் பயணித்து சாகசம் செய்யும் வீடியோவைப் பகிர்ந்துள்ள அவர், தனது ஃபிட்னஸ் மற்றும் விளையாட்டுத் திறனை வெளிப்படுத்தியுள்ளார்.
தமிழகத்தில் அரசியல் களம் நாளுக்கு நாள் சூடான விவாதங்களாலும், குடும்ப அரசியல் தொடர்பான பேச்சுக்களாலும் பரபரப்பாகச் சுழன்று கொண்டிருக்கும் வேளையில், அதைப் பற்றியெல்லாம் கவலைப்படாமல் இன்பநிதி வெளியிட்ட இந்தச் சர்பிங் வீடியோ இணையத்தில் பெரும் வரவேற்பைப் பெற்றுள்ளது. சினிமா மற்றும் விளையாட்டுத் துறையைச் சேர்ந்த பல பிரபலங்களும், நெட்டிசன்களும் இந்தச் சாகசப் பதிவுக்குத் தங்களது விருப்பங்களையும் வாழ்த்துகளையும் பதிவிட்டு வருகின்றனர்.
உதயநிதி ஸ்டாலின் திரைத்துறையில் தயாரிப்பாளராகக் களமிறங்கி, பின்னர் ‘ஒரு கல் ஒரு கண்ணாடி’ திரைப்படம் மூலம் நடிகராகி, தற்பொழுது தீவிர அரசியலில் ஈடுபட்டு வரும் சூழலில், இன்பநிதியும் அதே பாதையைப் பின்பற்றி விரைவில் தமிழ் சினிமாவில் கதாநாயகனாக அறிமுகமாக வாய்ப்புள்ளதாகத் தகவல்கள் உலா வருகின்றன. அதற்கு முன்னோட்டமாகவே அவர் தீவிர உடற்பயிற்சி மற்றும் விளையாட்டுச் சாகசங்களில் ஈடுபட்டு வருவதாகக் கூறப்படுகிறது.
