தமிழகத்தில் முதலமைச்சர் ஜோசப் விஜய் தலைமையிலான புதிய அரசு பொறுப்பேற்ற பிறகு, மாநிலத்தின் தொழில்துறை வளர்ச்சியை மேம்படுத்தவும் புதிய சர்வதேச முதலீடுகளை ஈர்க்கவும் பல்வேறு அதிரடி நடவடிக்கைகள் மேற்கொள்ளப்பட்டு வருகின்றன. இதன் ஒரு பகுதியாக, தமிழக தொழில்துறை அமைச்சர் கீர்த்தனா சம்பத் தனது முதல் அதிகாரப்பூர்வ வெளிநாட்டுப் பயணமாகத் தென் கொரியாவுக்குச் சென்றுள்ளார். அங்குள்ள முன்னணி நிறுவனங்களுடன் தமிழ்நாட்டிற்கான புதிய தொழில் முதலீடுகள் குறித்து அவர் தீவிரப் பேச்சுவார்த்தை நடத்தி வருகிறார்.
இப்பயணத்தின் மிக முக்கிய நிகழ்வாக, தென் கொரியாவின் உல்சான் (Ulsan) நகரில் அமைந்துள்ள உலகப் புகழ்பெற்ற ஹெச்டி ஹூண்டாய் ஹெவி இண்டஸ்ட்ரீஸ் (HD Hyundai Heavy Industries) நிறுவனத்தின் தலைமைச் செயலகம் மற்றும் பிரம்மாண்ட கப்பல் கட்டும் தளத்திற்கு (Shipyard) அமைச்சர் கீர்த்தனா தலைமையிலான உயர் அதிகாரிகள் குழுவினர் நேரில் சென்று ஆய்வு நடத்தினர். அங்கு நவீன முறையில் கப்பல்கள் கட்டப்படும் வசதிகள், அதிநவீன உற்பத்தி அமைப்புகள் மற்றும் கடல்சார் தொழில்நுட்பங்கள் குறித்து அமைச்சரின் குழுவினருக்கு அந்நிறுவன அதிகாரிகள் விரிவாக விளக்கமளித்தனர்.
தமிழ்நாட்டில் சர்வதேசத் தரத்திலான புதிய கப்பல் கட்டு தளம் அமைப்பது மற்றும் கடல்சார் உள் கட்டமைப்புகளை மேம்படுத்துவது தொடர்பாக இரு தரப்பிற்கும் இடையே ஆலோசனைகள் நடத்தப்பட்டன. ஏற்கனவே கடந்த ஆண்டு டிசம்பரில் ஹூண்டாய் நிறுவனத்தின் தாய் நிறுவனமான ஹெச்டி ஹூண்டாய், தமிழ்நாட்டில் புதிய கப்பல் கட்டும் தளம் அமைப்பதற்கான புரிந்துணர்வு ஒப்பந்தத்தை மேற்கொண்டிருந்தது. அதனைத் தொடர்ந்து, கடந்த ஏப்ரல் மாதத்தில் மத்திய அரசையும் இந்தத் திட்டத்தில் இணைத்து, ஒத்துழைப்பின் வரம்பு மேலும் விரிவுபடுத்தப்பட்டுள்ளது குறிப்பிடத்தக்கது.
வாகன உற்பத்தி, மின்னணுப் பொருட்கள் மற்றும் கனரகத் தொழில்களில் ஏற்கனவே இந்தியாவின் முன்னணி உற்பத்தி மையமாகத் திகழும் தமிழ்நாடு, தற்போது கப்பல் கட்டும் தொழிலிலும் உலகளாவிய முதலீட்டாளர்களை ஈர்க்கத் தொடங்கியுள்ளது. தென் கொரிய பயணத்தின் மூலம் பரஸ்பர ஒத்துழைப்பு வலுப்பெற்றுள்ளதால், தமிழ்நாட்டின் கடலோரப் பகுதிகளில் புதிய வேலைவாய்ப்புகளும், பொருளாதார வளர்ச்சியும் பெருமளவில் உருவாகும் என்று அமைச்சர் கீர்த்தனா சம்பத் நம்பிக்கை தெரிவித்துள்ளார்.
