ஈரானின் புதிய உச்ச தலைவராகப் பொறுப்பேற்றுள்ள ஆயத்துல்லா செய்யத் முஜ்தபா கமேனி, லெபனானின் ஹிஸ்புல்லா அமைப்பிற்கு அனுப்பியுள்ள பகிரங்கச் செய்தியில், அமெரிக்கா மற்றும் இஸ்ரேலின் ஆக்கிரமிப்புகளுக்கு எதிராகப் “போராட்டம் மற்றும் ஜிகாத் மட்டுமே ஒரே வழி” என்று பிரகடனம் செய்துள்ளார். ஹிஸ்புல்லா அமைப்பின் புதிய பொதுச்செயலாளர் ஷேக் நைம் காசிம் மற்றும் அதன் போராளிகள் ஈரானுக்கு விசுவாசம் தெரிவித்து எழுதிய கடிதத்திற்குப் பதிலளிக்கும் வகையில் முஜ்தபா கமேனி இந்த அதிரடி செய்தியை வெளியிட்டுள்ளார்.
ஈரான் நாட்டின் புதிய உச்ச தலைவராகப் பொறுப்பேற்ற பிறகு, வெளிப்படையாக சர்வதேச அரசியல் விவகாரத்தில் முஜ்தபா கமேனி விடுக்கும் முதல் முக்கிய அறிக்கை இதுவாகும். ஹிஸ்புல்லா அமைப்பைப் பாதுகாப்பதும், லெபனான் நாட்டின் பிராந்திய எல்லைகளைப் பேணிப் பாதுகாப்பதும் ஈரானின் “முக்கியமான மூலோபாயப் பொறுப்பு” (Strategic Mandate) என்று அவர் சுட்டிக்காட்டியுள்ளார். இஸ்ரேலின் தொடர் தாக்குதல்களுக்கு மத்தியிலும் ஹிஸ்புல்லா போராளிகள் காட்டி வரும் சகிப்புத்தன்மையையும் தியாகத்தையும் அவர் வெகுவாகப் பாராட்டியுள்ளார்.
மேலும், அமெரிக்காவுடனான மோதலை முடிவுக்குக் கொண்டுவருவதற்கும் எந்தவொரு அமைதி ஒப்பந்தத்திற்கும் முதன்மை நிபந்தனையாகப் புதிய கோரிக்கை ஒன்றை ஈரான் முன்வைத்துள்ளது. லெபனான் மீது இஸ்ரேல் நடத்தி வரும் அனைத்து இராணுவ நடவடிக்கைகளும் எவ்வித நிபந்தனையுமின்றி உடனடியாக நிறுத்தப்பட வேண்டும் என்றும், லெபனான் மண்ணில் இருந்து இஸ்ரேலியப் படைகள் முழுமையாக வெளியேற வேண்டும் என்றும் முஜ்தபா கமேனி தனது கடிதத்தில் திட்டவட்டமாக வலியுறுத்தியுள்ளார்.
மத்திய கிழக்கில் அமெரிக்கா மற்றும் இஸ்ரேலின் கூட்டமைப்புக்கு எதிராகப் போராடும் அமைப்புகளுக்கு ஈரானின் முழுமையான இராணுவ மற்றும் அரசியல் ஆதரவு தொடர்ந்து நீடிக்கும் என்பதை இச்செய்தி உறுதிப்படுத்தியுள்ளது. மறைந்த முன்னாள் உச்ச தலைவர் அலி கமேனி மற்றும் ஹிஸ்புல்லா தலைவர் ஹசன் நஸ்ரல்லா ஆகியோரின் வழியில் நின்று எதிரிகளை வீழ்த்துவோம் என ஈரான் அறிவித்துள்ளதால், அப்பகுதியில் ஏற்கனவே உச்சகட்டத்திலிருக்கும் போர் பதற்றம் மேலும் தீவிரமடைந்துள்ளது.
