ஈரானின் போர் விமானங்கள் தப்பிக்க பாகிஸ்தான் உதவியதா? – செயற்கைக்கோள் புகைப்பட ஆதாரத்தால் சிக்கிய பாகிஸ்தான்; இவர்கள் சமரசவாதிகளா? – அமெரிக்க எம்.பி.க்கள் கடும் கண்டனம்!

பாகிஸ்தானின் ராவல்பிண்டி பகுதியில் உள்ள மிகவும் முக்கியத்துவம் வாய்ந்த ‘நூர் கான்’ (Nur Khan) விமானப்படைத் தளத்தில் ஈரானின் ராணுவ விமானங்கள் நிறுத்தப்பட்டிருப்பதை அண்மைய செயற்கைக்கோள் புகைப்படங்கள் (Satellite Images) உறுதிப்படுத்தியுள்ளன. குறிப்பாக, ஈரானின் உளவு மற்றும் போக்குவரத்து விமானமான சி-130 (C-130 Hercules) அங்குள்ள ஒரு ஹேங்கர் அருகே நிறுத்தப்பட்டிருப்பது புகைப்படங்களில் தெளிவாகத் தெரிகிறது. அமெரிக்கா மற்றும் இஸ்ரேலின் வான்வழித் தாக்குதல்களில் இருந்து ஈரானின் முக்கியமான ராணுவ விமானங்களைப் பாதுகாப்பதற்காகப் பாகிஸ்தான் இந்த ரகசியப் புகலிடத்தை வழங்கியுள்ளதாகக் கூறப்படுகிறது.

இந்த விவகாரம் குறித்துப் பாகிஸ்தான் வெளியுறவுத் துறை அமைச்சகம் வெளியிட்டுள்ள விளக்கத்தில், “ஈரான் விமானங்கள் பாகிஸ்தானில் இருப்பது உண்மைதான். ஆனால், அவை தூதரகப் பேச்சுவார்த்தைகளுக்காகவும், அதிகாரிகளை அழைத்து வருவதற்காகவும் மட்டுமே வந்துள்ளன. போர் தொடர்பான எவ்வித ராணுவ உள்நோக்கமும் இதில் இல்லை” என்று தெரிவித்துள்ளது. இருப்பினும், அமெரிக்க அதிபர் டொனால்ட் டிரம்ப் அறிவித்த தற்காலிகப் போர் நிறுத்த காலத்தைப் பயன்படுத்தி, ஈரான் தனது பல விமானங்களை அண்டை நாடுகளான பாகிஸ்தான் மற்றும் ஆப்கானிஸ்தானுக்குப் பாதுகாப்பிற்காக அனுப்பியுள்ளதாக அமெரிக்க உளவு அமைப்புகள் கருதுகின்றன.

பாகிஸ்தான் ஒருபுறம் அமெரிக்கா மற்றும் ஈரான் இடையே அமைதிப் பேச்சுவார்த்தைகளை முன்னெடுக்கும் ‘சமரசவாதியாக’ (Mediator) தன்னை முன்னிறுத்திக் கொள்கிறது. ஆனால், மறுபுறம் ஈரானின் ராணுவத் தளவாடங்களுக்குப் பாதுகாப்பு அளிப்பது அமெரிக்காவின் அதிருப்தியைச் சம்பாதித்துள்ளது. இது குறித்துப் பேசியுள்ள அமெரிக்க செனட்டர் லிண்ட்சே கிரஹாம் (Lindsey Graham), “பாகிஸ்தான் ஈரானுக்குத் துணையாகச் செயல்பட்டால், அவர்களை ஒருபோதும் நம்ப முடியாது. சமரசப் பேச்சுவார்த்தையில் இருந்து பாகிஸ்தானை நீக்க வேண்டும்” என்று வலியுறுத்தியுள்ளார்.

ஏற்கனவே ஈரான் 90% யுரேனியம் செறிவூட்டப் போவதாக மிரட்டல் விடுத்துள்ள சூழலில், பாகிஸ்தானின் இந்தச் செயல் பிராந்திய பாதுகாப்பிற்குப் பெரும் சவாலாக மாறியுள்ளது. நூர் கான் விமானப்படைத் தளத்தில் புதிய ஹேங்கர்கள் (Hangars) கட்டப்பட்டு வருவதையும் செயற்கைக்கோள் படங்கள் காட்டுகின்றன. இது ஈரானின் மேலும் பல விமானங்களை மறைத்து வைப்பதற்கான ஏற்பாடோ என்ற சந்தேகம் எழுந்துள்ளது. இந்த விவகாரத்தால் அமெரிக்கா – பாகிஸ்தான் இடையிலான உறவில் மீண்டும் ஒரு விரிசல் ஏற்பட வாய்ப்புள்ளதாகச் சர்வதேச அரசியல் ஆய்வாளர்கள் கருதுகின்றனர்.