தமிழக சட்டப்பேரவையில் இன்று நடைபெற்ற நம்பிக்கை வாக்கெடுப்பில் முதலமைச்சர் விஜய் 144 வாக்குகளைப் பெற்று தனது பெரும்பான்மையை நிரூபித்தார். இந்த வாக்கெடுப்பின் போது திமுக எம்.எல்.ஏ-க்கள் வெளிநடப்பு செய்த நிலையில், திமுக தலைவர் மு.க. ஸ்டாலின் தனது சமூக வலைதளப் பக்கத்தில் விஜய்க்கு எதிராகக் கடுமையான கேள்விகளை முன்வைத்துள்ளார். “அரசியலுக்கு வரும்போது ‘தூய்மையான அரசியல்’, ‘ஊழலற்ற நிர்வாகம்’ எனப் பேசிவிட்டு, இன்று அதிமுக-வின் ஒரு பிரிவினரை விலைபேசி இழுத்து (Horse Trading), ‘Dirty Politics’ செய்வதன் மூலம் நீங்கள் தூய சக்தியாக இருக்க முடியுமா?” என்று அவர் கேள்வி எழுப்பியுள்ளார்.
தவெக அரசுக்கு ஆதரவளித்த அதிமுக-வின் எஸ்.பி. வேலுமணி மற்றும் சி.வி. சண்முகம் தரப்பினரை ‘வாங்கியுள்ளதாக’ (Purchase) ஸ்டாலின் குற்றம் சாட்டியுள்ளார். “பிளவுபட்ட அதிமுக-வின் ஆதரவு இல்லாமல் இந்த வெற்றி சாத்தியமில்லை. தொடக்கமே இவ்வளவு அசுத்தமாக இருக்கும்போது, உங்கள் ஆட்சியில் மக்கள் எத்தகைய நேர்மையை எதிர்பார்க்க முடியும்?” என்று அவர் சாடியுள்ளார். மேலும், திமுக தனது நிலைப்பாட்டில் உறுதியாக இருப்பதாகவும், ஜனநாயகத்தை விலைபேசும் இத்தகைய அரசியல் நடவடிக்கைகளைத் தட்டிக்கேட்கும் என்றும் அவர் அந்தப் பதிவில் குறிப்பிட்டுள்ளார்.
முன்னதாக, உதயநிதி ஸ்டாலின் தலைமையில் திமுக உறுப்பினர்கள் அவையிலிருந்து வெளிநடப்பு செய்தனர். அப்போது பேசிய உதயநிதி, “இன்று நடப்பது ஆட்சி மாற்றம் அல்ல, வெறும் இடமாற்றம் (Exchange). இன்ஸ்டாகிராம் ரீல்ஸ்களில் அரசியல் செய்வதை நிறுத்திவிட்டு, நிஜமான அரசியலைச் செய்யுங்கள்” என்று விஜய்யை விமர்சித்தார். தவெக-வின் வெற்றிக்கு அதிமுக-வின் அதிருப்தி குழுவே முக்கியக் காரணம் என்பதைச் சுட்டிக்காட்டிய திமுக, இந்த கூட்டணி ஒரு ‘தற்காலிகக் கூட்டணி’ என்றும் விமர்சித்துள்ளது.
மு.க. ஸ்டாலினின் இந்த ‘கிடுக்குப்பிடி’ கேள்விகளுக்குத் தவெக தரப்பில் இருந்து இன்னும் விரிவான பதில் வரவில்லை என்றாலும், பேரவையில் பேசிய முதலமைச்சர் விஜய், தங்களுக்கு மக்களின் ஆதரவே மிகப்பெரிய பெரும்பான்மை என்று குறிப்பிட்டார். எனினும், அதிமுக உறுப்பினர்கள் தவெக-வுக்கு ஆதரவாக வாக்களித்தது மற்றும் அதற்குப் பின்னணியில் நடந்த ரகசியச் சந்திப்புகள் குறித்து ஸ்டாலின் எழுப்பியுள்ள கேள்விகள், தமிழக அரசியல் களத்தில் விஜய்க்குப் புதிய சவால்களை உருவாக்கியுள்ளன.
