காவிரி நதிநீர் விவகாரம் மற்றும் கர்நாடகாவின் மேகேதாட்டு அணை திட்டத்திற்கு எதிர்ப்பு தெரிவித்துத் தருமபுரி மற்றும் ஒகேனக்கல் பகுதிகளில் தேமுதிக சார்பில் நடத்தப்பட்ட பிரம்மாண்டப் ஆர்ப்பாட்டத்தில் பேசிய கட்சியின் பொதுச்செயலாளர் பிரேமலதா விஜயகாந்த், “முதலமைச்சர் ச. ஜோசப் விஜய் உடனடியாகப் பெங்களூரு சென்று கர்நாடக முதலமைச்சர் மற்றும் துணை முதலமைச்சர் டி.கே. சிவகுமாருடன் பேச்சுவார்த்தை நடத்த வேண்டும்” என அதிரடியாகக் கோரிக்கை விடுத்துள்ளார்.
ஒகேனக்கல்லில் நடைபெற்ற ஆர்ப்பாட்டத்தில் காவிரி ஆற்று நீரை பாட்டிலில் எடுத்து மீண்டும் ஆற்றில் ஊற்றிப் போராட்டத்தைத் தொடங்கி வைத்த பிரேமலதா, கன்னட மொழியிலும் பேசித் தனது கண்டனத்தைப் பதிவு செய்தார். பின்னர் செய்தியாளர்களிடம் பேசிய அவர், “முதலமைச்சர் விஜய் தனது சொந்த லாபத்திற்காகவும் ஆன்மீக வழிபாட்டிற்காகவும் கர்நாடகாவில் உள்ள கோவில்களுக்குச் செல்லும் போது, தமிழ்நாட்டின் வாழ்வாதாரப் பிரச்சினையான காவிரி நீருக்காக ஏன் அம்மாநிலத்திற்கு நேரடியாகச் சென்று பேச்சுவார்த்தை நடத்தக் கூடாது?” என நேரிடையாகக் கேள்வி எழுப்பினார்.
மேலும், காவிரி மேலாண்மை ஆணையம் தமிழ்நாட்டிற்கு நாள்தோறும் 3,500 கனஅடி நீரைத் திறந்து விடுமாறு கர்நாடகாவிற்கு உத்தரவிட்டும் அதை அம்மாநில அரசு மதிக்கவில்லை எனச் சாடிய அவர், வரும் ஆகஸ்ட் 5-ஆம் தேதி தொடங்கவுள்ள தமிழகச் சட்டமன்றப் பேரவைக் கூட்டத்தொடரில் காவிரி விவகாரம் குறித்து அனைத்துக் கட்சிகளின் ஆதரவோடு ஒருமனதாகத் தீர்மானம் நிறைவேற்ற வேண்டும் என வலியுறுத்தினார். காவிரி நீரைப் பெற உடனடியாக அனைத்துக் கட்சித் தலைவர்கள் கூட்டத்தைக் கூட்டிப் பிரதமரிடம் தூதுக்குழு செல்ல வேண்டும் என்றும் அவர் கேட்டுக்கொண்டார்.
முதலமைச்சர் விஜய் வெறும் சென்னையோடு நின்றுவிடாமல் மேட்டூர், ஒகேனக்கல் மற்றும் டெல்டா மாவட்டங்களுக்கு நேரில் சென்று விவசாயிகளின் இன்னல்களைப் பார்வையிட வேண்டும் என்றும், மின் பற்றாக்குறை மற்றும் குடிநீர் தட்டுப்பாட்டைப் போக்கத் துரித நடவடிக்கை எடுக்க வேண்டும் என்றும் அவர் வலியுறுத்தினார். காவிரி நதிநீர் உரிமைக்காகத் தேமுதிக சார்பாகக் களமிறங்கியுள்ள பிரேமலதாவின் இந்த அதிரடி பேச்சு, ஆகஸ்ட் 5 சட்டசபைக் கூட்டத்தொடர் தொடங்குவதற்கு முன்பாக அரசியல் களத்தில் பெரும் விவாதத்தைக் கிளப்பியுள்ளது.
