பாஜகவின் முன்னாள் மாநிலத் தலைவரும் ‘வீ தி லீடர்ஸ்’ (We The Leaders) அமைப்பின் நிறுவனருமான கே. அண்ணாமலை, விரைவில் புதிய அரசியல் கட்சி தொடங்கவுள்ளதாக வெளியாகும் தகவல்கள் குறித்துப் மூத்த நடிகரும் அரசியல் விமர்சகருமான எஸ்.வி.சேகர் மிகக் கடுமையான சாடல்களையும் கேள்விகளையும் முன்வைத்துள்ளார்.
தமிழக பாஜக தலைவர் பொறுப்பில் இருந்து விலகிய அண்ணாமலை, இளைஞர்களைக் கவரும் நோக்கில் ‘வீ தி லீடர்ஸ்’ என்ற அமைப்பைத் தொடங்கிச் செயல்பட்டு வருகிறார். தற்போது அந்த அமைப்பைப் புதிய அரசியல் கட்சியாக மாற்ற அவர் திட்டமிட்டு வருவதாக அரசியல் வட்டாரங்களில் பரபரப்பான விவாதங்கள் எழுந்துள்ள நிலையில், இது குறித்து ஊடகங்களிடம் பேசிய எஸ்.வி.சேகர், அண்ணாமலையின் இந்த அரசியல் நகர்வைப் பலமாக விமர்சித்துள்ளார்.
“அரசியலில் இதுவரை எதையுமே சாதிக்காத ஒருவர் புதிய கட்சி தொடங்குவது வேடிக்கையானது; மக்கள் செல்வாக்கு இல்லாத நிலையில் கட்சி தொடங்கி என்ன செய்யப் போகிறார்?” எனக் கேள்வி எழுப்பிய எஸ்.வி.சேகர், “தான் சம்பாதித்து வைத்துள்ள பணத்தையும் புகழையும் காப்பாற்றிக் கொள்வதற்காகவே அவர் இதுபோன்ற புதிய கட்சி நாடகத்தை அரங்கேற்ற முயல்கிறாரா?” எனக் கடுமையாகச் சாடியுள்ளார்.
ஏற்கனவே பாஜக நிர்வாகிகளுடன் கருத்து வேறுபாடு கொண்டு ஒதுங்கியுள்ள அண்ணாமலையை, எஸ்.வி.சேகர் தொடர்ந்து விமர்சித்து வருவது அரசியல் களத்தில் உன்னிப்பாகக் கவனிக்கப்பட்டு வருகிறது. அண்ணாமலையின் புதிய கட்சித் தொடக்கம் மற்றும் அதற்கு எதிராக எழும் இந்த விமர்சனங்கள் தமிழகத்தின் தற்போதைய அரசியல் சூழலில் புதிய விவாதத்தை ஏற்படுத்தியுள்ளன.
