வாஷிங்டன்: அமெரிக்க அதிபர் டொனால்ட் ட்ரம்ப் அறிவித்துள்ள அணுசக்தியால் இயங்கும் அதிநவீன ‘ட்ரம்ப்-கிளாஸ்’ (Trump-class) போர்க்கப்பல்களைக் கொண்ட ‘கோல்டன் ஃபிலீட்’ (Golden Fleet) திட்டத்தை உருவாக்க சுமார் 275 பில்லியன் டாலர் (இந்திய மதிப்பில் சுமார் ரூ.23 லட்சம் கோடிக்கும் அதிகம்) செலவாகும் என அமெரிக்க நாடாளுமன்ற பட்ஜெட் அலுவலகம் (CBO) அதிகாரப்பூர்வமாகக் கணித்துள்ளது. உலக வரலாற்றிலேயே மிக அதிகச் செலவிலான போர்க்கப்பல் திட்டமாக இது உருவெடுத்துள்ளதால் சர்வதேச பாதுகாப்பு வட்டாரத்தில் பெரும் அதிர்வலைகள் ஏற்பட்டுள்ளன.
அமெரிக்கக் கடற்படையின் பலத்தை அதிகரிக்கும் நோக்கில் 15 புதிய அணுசக்தி போர்க்கப்பல்களைக் கட்ட ட்ரம்ப் திட்டமிட்டுள்ளார். CBO வெளியிட்டுள்ள அறிக்கையின்படி, இந்த வரிசையில் உருவாக்கப்படும் முதல் போர்க்கப்பலின் மதிப்பு மட்டும் 23.4 பில்லியன் டாலராக இருக்கும் என்றும், அதைத் தொடர்ந்து கட்டப்படும் எஞ்சிய 14 கப்பல்கள் ஒவ்வொன்றும் தலா 18 பில்லியன் டாலர் செலவில் உருவாக்கப்படும் என்றும் தெரிவிக்கப்பட்டுள்ளது. இது உலகின் மிகப்பெரிய விமான தாங்கிக் கப்பலான ‘யுஎஸ்எஸ் ஜெரால்ட் ஆர் ஃபோர்ட்’ (USS Gerald R. Ford) கப்பலின் தயாரிப்புச் செலவை விட மிக அதிகம் என்பது குறிப்பிடத்தக்கது.
சுமார் 35,000 டன் எடையும் 880 அடி நீளமும் கொண்டதாக வடிவமைக்கப்படவுள்ள இந்த பிரம்மாண்ட போர்க்கப்பல்களில், ஹைப்பர்சோனிக் ஏவுகணைகள், லேசர் ஆயுதங்கள், ரெயில்கன் (Railgun) மற்றும் அணுசக்தி ஏவுகணைகள் உள்ளிட்ட அதிநவீன தொழில்நுட்பங்கள் பொருத்தப்படவுள்ளன. சீனக் கடற்படையின் வேகமான வளர்ச்சியை எதிர்கொள்ள அமெரிக்கா இத்திட்டத்தை முன்னெடுத்தாலும், 2056 ஆம் ஆண்டுக்குள் இத்திட்டத்தை முழுமையாக முடிப்பதில் அமெரிக்கக் கப்பல் கட்டும் தளங்களின் கொள்ளளவுக்குப் பெரிய சவால் ஏற்படும் என்றும் சுட்டிக்காட்டப்பட்டுள்ளது.
அதேவேளையில், நவீன போர்க்கலை நிபுணர்கள் பலர் இத்திட்டத்திற்கு எதிர்ப்பும் தெரிவித்து வருகின்றனர். ஏவுகணைகள் மற்றும் ட்ரோன் தாக்குதல்கள் நிறைந்த தற்போதைய நவீனப் போர்க்காலத்தில், இவ்வளவு பெரிய மற்றும் அதிகச் செலவிலான போர்க்கப்பல்கள் எதிரிகளின் எளிமையான இலக்குகளாக (“Bomb Magnets”) மாற வாய்ப்புள்ளதாக அவர்கள் எச்சரிக்கின்றனர். இருப்பினும், அமெரிக்க ராணுவ மேலாதிக்கத்தையும் கப்பல் கட்டும் தொழிலையும் மீண்டும் கட்டியெழுப்ப இத்திட்டம் மிக அவசியம் என ட்ரம்ப் நிர்வாகம் உறுதியாகத் தெரிவித்துள்ளது.
