தமிழக வெற்றிக் கழகம் (தவெக) அரசுக்கு எதிராகச் சட்டமன்றத்தில் கொண்டு வரப்படும் தீர்மானத்திற்கு ஆதரவாக வாக்களிக்க, அக்கட்சியின் சட்டமன்ற உறுப்பினர்களைக் கோடிக்கணக்கான ரூபாய் கொடுத்து விலைக்கு வாங்க முயன்ற ‘குதிரை பேரம்’ (Horse Trading) விவகாரம் தமிழக அரசியலில் பெரும் பூகம்பத்தைக் கிளப்பியுள்ளது. இந்தச் சதித் திட்டத்திற்காகச் சென்னையில் பதுக்கி வைக்கப்பட்டிருந்த ரூ. 2.82 கோடி அட்வான்ஸ் பணத்தை மாநகரத் தனிப்படை போலீசார் அதிரடியாகப் பறிமுதல் செய்துள்ளனர். இந்த விவகாரத்தில் தற்போது கைதானவர்களின் எண்ணிக்கை 14 ஆக உயர்ந்துள்ளது.
கிருஷ்ணகிரி மாவட்டம் உத்தங்கரை தொகுதி தவெக எம்.எல்.ஏ-வான என். இளையராஜா, கடந்த ஜூன் 29 அன்று சென்னை காவல் ஆணையரிடம் கொடுத்த அதிரடிப் புகாரில் இந்த விவகாரம் வெளிச்சத்திற்கு வந்தது. சட்டமன்றத்தில் சபாநாயகருக்கு எதிராகக் கொண்டு வரப்படும் நம்பிக்கையில்லாத் தீர்மானத்தில் தவெக நிலப்பாட்டிற்கு எதிராக வாக்களித்தால், அதற்குப் பிரதிபலனாகத் தனக்கு ரூ. 35 கோடி தருவதாக ஐபிடிஎஸ் (IPDS) என்ற அரசியல் கருத்துக்கணிப்பு நிறுவனத்தை நடத்தி வரும் திருநாவுக்கரசு என்பவர் பேரம் பேசியதாகவும், அதற்குத் தான் மறுத்ததால் தனக்கும் தன் குடும்பத்திற்கும் கொலை மிரட்டல் விடுத்ததாகவும் இளையராஜா தனது புகாரில் குறிப்பிட்டிருந்தார்.
இதைத் தொடர்ந்து திருவல்லிக்கேணி போலீசார் வழக்குப் பதிவு செய்து தீவிர விசாரணை மேற்கொண்டு வந்தனர். இந்த விசாரணையின் ஒரு பகுதியாகச் சென்னை சூளைமேடு பகுதியில் உள்ள ‘தீபம் ஃபைனான்ஸ்’ (Deepam Finance) என்ற தனியார் நிதி நிறுவனத்தில் போலீசார் நடத்திய அதிரடிச் சோதனையில், கணக்கில் வராத ரூ. 2.82 கோடி ரொக்கப் பணம் பறிமுதல் செய்யப்பட்டது. இது தவெக சட்டமன்ற உறுப்பினர்களை விலைக்கு வாங்குவதற்காக, ஏற்கனவே கைதான முக்கியக் குற்றவாளி ஒருவரால் அட்வான்ஸ் தொகையாக அங்குப் பதுக்கி வைக்கப்பட்டிருந்த பணம் என்பது விசாரணையில் உறுதி செய்யப்பட்டுள்ளது.
இதைத் தொடர்ந்து, அந்த நிதி நிறுவனத்தை நடத்தி வந்த கொரட்டூரைச் சேர்ந்த செல்வம் கருணாநிதி (52), சாளிகிராமத்தைச் சேர்ந்த சரவணன் (45) ஆகிய இருவரைப் போலீசார் அதிரடியாகக் கைது செய்துள்ளனர். இந்த வழக்கில் முன்னாள் அமைச்சர் வி. செந்தில் பாலாஜி மற்றும் அவரது சகோதரர் அசோக் குமார் ஆகியோரின் பெயர்களும் அடிபடுவதால், அவர்கள் சென்னை உயர் நீதிமன்றத்தில் நிபந்தனை முன்ஜாமீன் பெற்றுள்ளனர். தவெக சட்டமன்ற உறுப்பினர்களைப் பிரிக்கப் பெரிய கார்ப்பரேட் நிறுவனம் மூலம் சுமார் 180 கோடி ரூபாய் வரை நிதி ஒதுக்கப்பட்டதாக வெளியாகும் திடுக்கிடும் தகவல்கள், தவெக தலைவர் விஜய் தலைமையிலான புதிய அரசு வட்டாரங்களிலும், தமிழக அரசியல் களத்திலும் தற்பொழுது மிகப்பெரிய பரபரப்பை ஏற்படுத்தியுள்ளது.
