தமிழகத்தில் ஆட்சி மாற்றம் ஏற்பட்டு தமிழக வெற்றிக் கழகம் (தவெக) அரியணையில் ஏறியுள்ள நிலையில், தற்போதைய ஆளுங்கட்சிக்கும் எதிர்க்கட்சியான திமுகவிற்கும் இடையே சட்டமன்றத்தில் அனல் பறக்கும் விவாதங்கள் அரங்கேறி வருகின்றன. குறிப்பாக, தமிழகத்தில் ஆங்காங்கே ஏற்படும் மின்வெட்டு (Power Cut) பிரச்சினையை முன்வைத்து எதிர்க்கட்சித் தலைவர் உதயநிதி ஸ்டாலின் உள்ளிட்ட திமுகவினர் தவெக அரசை மிகக் கடுமையாக விமர்சித்து வருகின்றனர். இதற்கு தவெக தரப்பில் இருந்து அமைச்சர் KAS (கே.ஏ.செங்கோட்டையன்) சினிமா பாணியில், திமுகவின் பழைய வரலாற்றையே தோண்டி எடுத்து நறுக் என்று பதிலடி கொடுத்துள்ளார்.
சட்டமன்ற மரபுகள் குறித்தும், எதிர்க்கட்சிகளின் செயல்பாடுகள் குறித்தும் காரசாரமாகப் பேசிய அமைச்சர் KAS, கடந்த கால திமுக ஆட்சியில் மின்வெட்டு ஏற்பட்டபோது அவர்கள் சொன்ன விசித்திரமான காரணங்களை மேடையில் போட்டு உடைத்தார். “திமுக ஆட்சியில் மின்வெட்டு வந்தபோது, அணில் கடித்ததால் தான் ‘பியூஸ் கேரியர்’ போய்விட்டது, அதனால்தான் பவர் கட் ஆனது என்று விசித்திரமான கதைகளைச் சொன்னார்களா இல்லையா?” என்று அமைச்சர் கேள்வி எழுப்பினார். மேலும், ஆற்காடு வீராசாமி அமைச்சராக இருந்த காலகட்டத்தையும், மின்வெட்டு காரணமாகவே ஒரு ஆட்சி போன வரலாற்றையும் சுட்டிக்காட்டி திமுகவிற்குப் பதிலடி கொடுத்துள்ளார்.
சட்டமன்றத்தில் முதல்வர் விஜய் பேசத் தொடங்கியவுடன் எதிர்க்கட்சியினர் வெளிநடப்பு செய்தது குறித்தும் அமைச்சர் KAS கடுமையான விமர்சனங்களை முன்வைத்தார். “முதலமைச்சர் பேச வேண்டும் என்று ஆளுநர் உரையின்போது கருப்பு பேட்ச் குத்திக்கொண்டு கூச்சலிட்டவர்கள், அவர் பேச வந்தவுடன் ஏன் ஓடுகிறார்கள்? அவருடைய தொலைநோக்கு பார்வையும், வேகமும், ஆற்றலும் இவர்களைப் பயந்துபோகச் செய்துவிட்டது. இவர் பேசாமல் இருந்ததே பரவாயில்லை என்று நினைத்து பயந்து ஓடிவிட்டார்கள்” என்று சினிமா பாணியில் ‘பஞ்ச்’ வைத்தார் அமைச்சர். கடந்த காலங்களில் சட்டமன்றத்தில் சபாநாயகரையே கீழே தள்ளிவிட்டு இருக்கையில் அமர்ந்த கதையெல்லாம் எதிர்க்கட்சிகளுக்கு உண்டு என்றும் அவர் சாடினார்.
இறுதியாக, தவெக அரசு மக்கள் நலத்திட்டங்களை மிகச் சிறப்பாகச் செயல்படுத்தி வருவதாகக் குறிப்பிட்ட அமைச்சர், தவெக தலைவர் மற்றும் தமிழக முதல்வர் தளபதியின் தாரக மந்திரமே மக்களுக்கு நல்ல திட்டங்களைச் சென்றடைய வைப்பதுதான் என்றார். “நாங்கள் ஆட்சிக்கு வந்தவுடனேயே படிப்படியாக எல்லா திட்டங்களையும் நிறைவேற்றுவோம் என்று முதலிலேயே சொல்லிவிட்டோம். எங்களுக்குக் கொஞ்சம் கால அவகாசம் கொடுங்கள், நிதிநிலையைக் கையாண்டு ஒவ்வொன்றாகச் செயல்படுத்திக் காட்டுவோம்” என்று மக்கள் மன்றத்தில் தெளிவுபடுத்தியுள்ளார். மக்கள் மன்றத்தால் நிராகரிக்கப்பட்டவர்கள் எழுப்பும் அரசியல் உள்நோக்கம் கொண்ட கேள்விகளுக்கு அரசு எப்போதும் அஞ்சாது என்றும் தவெக தரப்பில் திட்டவட்டமாகத் தெரிவிக்கப்பட்டுள்ளது.
