தஞ்சாவூர்: காவிரி உரிமைப் போராட்ட ஆர்ப்பாட்டத்தில் பேசிய பேச்சு தொடர்பாகக் கைது செய்யப்பட்டு, உயர்நீதிமன்ற உத்தரவின்படி காவல் நிலையப் பிணையில் (Station Bail) விடுவிக்கப்பட்ட தமிழக சட்டமன்ற எதிர்க்கட்சித் தலைவரும் திமுக இளைஞரணிச் செயலாளருமான உதயநிதி ஸ்டாலின், ஆளும் தவெக அரசை மிகக் கடுமையாக விமரிசித்துப் பேசியுள்ளார். “குறிப்பிட்ட எந்தவொரு பெண்ணையும் தவறாகப் பேச வேண்டும் என்ற எண்ணம் எனக்குத் துளிக்கூட இல்லை; தவெக அரசு நடத்துவது ஆட்சியல்ல, ஒரு சர்க்கஸ்கூடம்” என்று அவர் செய்தியாளர்களிடம் அதிரடியாகத் தெரிவித்துள்ளார்.
தஞ்சாவூர் செங்கிப்பட்டி காவல் நிலையத்தில் நடைபெற்ற விசாரணைக்குப் பிறகு வெளியே வந்த உதயநிதி ஸ்டாலின், காவிரி விவகாரத்தில் தவெக அரசின் மெத்தனப் போக்கைக் கண்டித்துப் போராடியதற்காகவே தன் மீது திட்டமிட்டு வழக்குப்பதிவு செய்யப்பட்டுள்ளதாகக் கூறினார். அரசியல் ரீதியாகத் தன்னை எதிர்கொள்ள முடியாததால், பேச்சைத் தவறாகத் திரித்து அரசியல் காழ்ப்புணர்ச்சியோடு கைது நடவடிக்கையை ஆளுங்கட்சி மேற்கொண்டதாகச் சாடினார்.
மேலும் பேசிய அவர், “நாளை தொடங்கவுள்ள சட்டமன்ற பட்ஜெட் கூட்டத்தொடரில் அரசின் தோல்விகளைப் பட்டியலிட்டுப் பேசக் கூடாது என்பதற்காகவே இந்த நாடகத்தை முதலமைச்சர் விஜய்யின் அரசு நடத்தியுள்ளது” என்று குற்றம் சாட்டினார். காவல்துறையைத் தன் சொந்த விருப்பத்திற்குப் பயன்படுத்தும் இந்த அரசு, ஜனநாயக மாண்புகளைக் காற்றில் பறக்கவிட்டுச் சர்க்கஸ் நடத்தி வருகிறது என்றும் விமர்சித்தார்.
கொட்டும் மழையிலும் தனக்காக வீதியில் இறங்கிப் போராடிய திமுக தொண்டர்களுக்கு நன்றி தெரிவித்த உதயநிதி ஸ்டாலின், இத்தகைய அடக்குமுறைகளுக்கும் பொய் வழக்குகளுக்கும் திமுக ஒருபோதும் அஞ்சாது என்றார். பொய் வழக்குகளைச் சட்டரீதியாகவும் மக்கள் மன்றத்திலும் எதிர்கொண்டு வெற்றி பெறுவோம் எனக் கூறிவிட்டு அவர் சென்னைக்குப் புறப்பட்டார்.
