உலகப் புகழ்பெற்ற பிரிட்டனின் ஆக்ஸ்போர்டு பல்கலைக்கழக விவாதக் கழகத்தின் (Oxford Union) தலைவியாகச் சமீபத்தில் பொறுப்பேற்ற அர்வா எல்ரயீஸ் (Arwa Elrayess) என்ற பாலஸ்தீன மாணவி, பயங்கரவாத அமைப்பான ஹமாஸுக்கு பகிரங்கமாக ஆதரவு தெரிவித்ததாகக் கூறி அவர் மீது பிரிட்டிஷ் காவல்துறை தீவிர விசாரணையைத் தொடங்கியுள்ளது. 202 ஆண்டுகால ஆக்ஸ்போர்டு விவாதக் கழக வரலாற்றிலேயே அதன் தலைவராகத் தேர்ந்தெடுக்கப்பட்ட முதல் பாலஸ்தீனப் பெண் என்ற பெருமையைப் பெற்ற இவர், யூதர்களுக்கு எதிரான வன்முறையை நியாயப்படுத்தியதாக எழுந்துள்ள புகார்கள் பிரிட்டன் கல்வி மற்றும் அரசியல் வட்டாரங்களில் பெரும் புயலைக் கிளப்பியுள்ளன.
பிரிட்டனின் முன்னணி ஊடகமான ‘தி டெலிகிராப்’ வெளியிட்டுள்ள அதிர்ச்சித் தகவலின்படி, ஆக்ஸ்போர்டு பல்கலைக்கழகத்தில் அரசியல், தத்துவம் மற்றும் பொருளாதாரம் (PPE) பயிலும் மாணவர்களுக்கான ரகசிய வாட்ஸ்அப் குழு (WhatsApp Group) ஒன்றில் அர்வா எல்ரயீஸ் பகிர்ந்த சில குறுஞ்செய்திகள் கசிந்துள்ளன. அதில், கடந்த 2023 அக்டோபர் 7-ல் இஸ்ரேல் மீது ஹமாஸ் நடத்திய கொடூரமான பயங்கரவாதத் தாக்குதலை “விகிதாச்சார அடிப்படையிலானது” (Proportional) என்று அவர் நியாயப்படுத்தியுள்ளார். மேலும், “எந்தவொரு விடுதலைப் போராட்டக் குழுவையும் மேற்கத்திய நாடுகள் தொடக்கத்தில் பயங்கரவாதிகள் என்றுதான் கூறும்; ஆனால் அவர்கள் சுதந்திரம் பெற்ற பிறகு உலக வரலாற்றில் மாவீரர்களாகக் (Heroes) கொண்டாடப்படுவார்கள்” என்று ஹமாஸ் அமைப்பினரை ஹீரோக்களாகச் சித்தரித்து அவர் எழுதியுள்ளார்.
இந்த வாட்ஸ்அப் செய்திகள் கசிந்ததைத் தொடர்ந்து, பிரிட்டனில் உள்ள யூத அமைப்புகள் மற்றும் ‘இனவெறிக்கு எதிரான பிரச்சாரக் குழு’ (Campaign Against Antisemitism) ஆகியவை காவல்துறை மற்றும் பல்கலைக்கழக நிர்வாகத்திடம் அதிகாரப்பூர்வப் புகார்களை அளித்துள்ளன. “இஸ்ரேலில் ஆயிரக்கணக்கான யூதப் பொதுமக்களைக் கொன்று குவித்த கொடூரத்தை ‘விகிதாச்சாரம்’ என்று கூறுவது, யூத இனப்படுகொலையைச் சாதாரணமான ஒன்றாக மாற்றும் (Normalizing slaughter of Jews) ஆபத்தான நாசகாரச் சிந்தனையாகும்” என்று அந்த அமைப்புகள் கொதிப்படைந்துள்ளன. அர்வா எல்ரயீஸ் உடனடியாக தனது தலைவர் பதவியை ராஜினாமா செய்ய வேண்டும் என்றும், அவரை பல்கலைக்கழகத்தில் இருந்து நீக்க வேண்டும் என்றும் கடுமையான கோரிக்கைகள் எழுந்துள்ளன.
இந்த விவகாரம் குறித்துப் பிரிட்டிஷ் பயங்கரவாத தடுப்புப் பிரிவு காவல்துறை விசாரணை வளையத்திற்குள் கொண்டுவரப்பட்டுள்ள அர்வா எல்ரயீஸ், “எனது கருத்துக்கள் பொது அறிக்கைக்காக எழுதப்பட்டவை அல்ல; அது வெறும் ஒரு கல்விசார் கோட்பாடு மற்றும் வரலாற்று ரீதியான விவாதச் சூழலின் வெளிப்பாடு மட்டுமே தவிர, நான் வன்முறையையோ அல்லது சர்வதேச சட்ட மீறல்களையோ ஒருபோதும் ஆதரிக்கவில்லை” என்று தற்காப்பு விளக்கம் அளித்துள்ளார். இருப்பினும், பயங்கரவாத அமைப்புகளுக்கு ஆதரவளிப்பது பிரிட்டனில் குற்றவியல் சட்டப்படி தண்டனைக்குரியது என்பதால், இந்த விவகாரம் ஆக்ஸ்போர்டு வளாகத்தில் யூத மாணவர்களிடையே கடும் அச்சத்தையும் பதற்றத்தையும் ஏற்படுத்தியுள்ளது.
