மத்திய கிழக்கு பிராந்தியத்தில் ஈரான் உடனான போர் 5 மாதங்களுக்கும் மேலாக நீடித்து வரும் நிலையில், பாரசீக வளைகுடாவில் ரோந்துப் பணியில் ஈடுபட்டுள்ள அமெரிக்காவின் ‘யுஎஸ்எஸ் ஆபிரகாம் லிங்கன்’ (USS Abraham Lincoln) என்ற போர்க்கப்பலில் உள்ள அமெரிக்கக் கடற்படை வீரர்கள் கடுமையான மன உளைச்சலுக்கு ஆளாகியுள்ளனர். தொடர்ந்து 210 நாட்களுக்கும் மேலாக எவ்வித இடைவெளியுமின்றி கடலில் நிறுத்தப்பட்டுள்ளதால் ஏற்பட்ட சோர்வு மற்றும் மோசமான சூழ்நிலை காரணமாக, கப்பலில் உள்ள சிலர் கடலில் குதித்து தற்கொலை செய்ய முயன்றதாக வெளியாகும் அதிர்ச்சித் தகவல்கள் சர்வதேச அரங்கில் பரபரப்பை ஏற்படுத்தியுள்ளன.
போர்க்கப்பலில் பணியாற்றும் சுமார் 5,000 வீரர்களுக்குத் தேவையான அடிப்படை வசதிகள் சீர்குலைந்துள்ளதாக அமெரிக்க ஊடகங்கள் சுட்டிக்காட்டியுள்ளன. புழுத்துப் போன குளியலறைகள், செயல்படாத கழிப்பறைகள், போதுமான சுத்தமான குடிநீர் இல்லாத நிலை மற்றும் தரமற்ற அரைகுறை உணவு ஆகியவை வீரர்களின் மனநிலையை வெகுவாகப் பாதித்துள்ளன. இது தொடர்பாக கப்பலில் உள்ள வீரர்களின் குடும்பத்தினர் அமெரிக்கக் கடற்படை தலைமை மற்றும் பாராளுமன்ற உறுப்பினர்களிடம் தங்களது கடும் கவலையையும் கண்டனத்தையும் தெரிவித்து வருகின்றனர்.
இருப்பினும், இந்த விவகாரம் குறித்துப் பேட்டியளித்த அமெரிக்க அதிபர் டொனால்ட் டிரம்ப், “அமெரிக்க வீரர்கள் போர்க்கப்பலில் நீண்ட காலம் இருப்பது ஒன்றும் பெரிய விஷயம் அல்ல, அது போதுமான காலம் அல்ல” என அசட்டையாகப் பதிலளித்துள்ளது மேலும் கொந்தளிப்பை ஏற்படுத்தியுள்ளது. அமெரிக்க வீரர்களின் மனநலப் பாதிப்பு மற்றும் தற்கொலை முயற்சிகள் குறித்த புகார்களைப் பென்டகன் மற்றும் கடற்படை அதிகாரிகள் மறுத்து வரும் நிலையில், டிரம்பின் இந்த அலட்சியப் பேச்சு எதிர்க்கட்சியான ஜனநாயகக் கட்சியினரிடையே கடும் விமர்சனத்தை எதிர்நோக்கியுள்ளது.
போர் உடனடியாக முடியும் என்று உறுதியளித்துத் தொடங்கப்பட்ட இந்த நடவடிக்கை மாதக்கணக்கில் நீடிப்பதும், வளைகுடா பகுதியில் நீடிக்கும் கடல்சார் முற்றுகையினால் வீரர்கள் ஓய்வின்றி 12 முதல் 16 மணிநேரக் கடுமையான பணியில் ஈடுபடுத்தப்படுவதும் நிலைமையை மேலும் மோசமாக்கியுள்ளது. தங்களது உறவினர்களைப் பாதுகாப்பாக தாய்நாடு திரும்பப் பெறக் கோரி அமெரிக்கக் குடும்பத்தினர் தொடர் போராட்டங்களை நடத்தி வருவது டிரம்ப் நிர்வாகத்திற்குப் பெரும் நெருக்கடியை உருவாக்கியுள்ளது.
