காவிரி நீர் மேலாண்மை ஆணையம் மற்றும் காவிரி நீர் முறைப்படுத்தும் குழுவின் உத்தரவுகளை மதிக்காமல், தமிழ்நாட்டிற்கு உரிய காவிரி நீரைத் திறந்துவிட மறுத்து வரும் கர்நாடக அரசுக்கு எதிராகத் தமிழ்நாடு அரசு உச்சநீதிமன்றத்தில் அவசர மனுத் தாக்கல் செய்துள்ளது. காவிரி படுகையின் நீரியல் வானிலை நிலவரங்களை ஆய்வு செய்த நீர் முறைப்படுத்தும் குழு, ஜூலை 29 முதல் ஆகஸ்ட் 12 வரை தினமும் வினாடிக்கு 3,500 கனஅடி தண்ணீர் பிலிகுண்டுலுவில் கிடைப்பதை உறுதி செய்யுமாறு உத்தரவிட்டிருந்தது. எனினும், கர்நாடக அரசு இதனைச் செயல்படுத்தத் தவறியதால் சட்டப் போராட்டம் துரிதப்படுத்தப்பட்டுள்ளது.
முறைப்படுத்தும் குழுவின் உத்தரவுக்குப் பிறகு, பிலிகுண்டுலு எல்லைக்கு வந்து சேரவேண்டிய நீரின் அளவைக் காட்டிலும் மிகக் குறைந்த அளவே தண்ணீர் வந்து சேர்ந்துள்ளது. ஆகஸ்ட் 3-ஆம் தேதி நிலவரப்படி, கர்நாடகாவின் கிருஷ்ணராஜ சாகர் (KRS), கபினி, ஹாரங்கி மற்றும் ஹேமாவதி ஆகிய நான்கு முக்கிய அணைகளிலும் சேர்த்து மொத்தம் 77.537 டிஎம்சி நீர் இருப்பு உள்ளது. போதிய நீர் இருப்பு இருந்தபோதிலும், விகிதாச்சார அடிப்படையில் தமிழ்நாட்டிற்குத் தரவேண்டிய தண்ணீரைத் திறந்துவிடக் கர்நாடகா தொடர்ந்து அடம்பிடித்து வருகிறது.
சமீப நாட்களாக கேஆர்எஸ் மற்றும் கபினி அணைகளின் நீர்ப்பிடிப்புப் பகுதிகளில் கனமழை பெய்து நீர்வரத்து கணிசமாக அதிகரித்துள்ளது. இந்த மழைப்பொழிவின் விகிதாச்சாரப்படி தமிழ்நாட்டிற்குச் சேர வேண்டிய நீரின் அளவு 26.954 டிஎம்சி ஆகும். ஆனால், காவிரி மேலாண்மை ஆணையம் உத்தரவிட்ட அளவைக் காட்டிலும் 4.536 டிஎம்சி மிகக் குறைவாகவே தண்ணீர் கிடைத்துள்ளதால் டெல்டா மாவட்ட விவசாயிகளின் குறுவைச் சாகுபடி மற்றும் குடிநீர் தேவைகள் கேள்விக்குறியாகியுள்ளன.
இந்தச் சூழலில், தமிழ்நாட்டின் நீர் உரிமைகளைப் பாதுகாக்கவும், உரிய காலத்தில் தடையின்றித் தண்ணீர் பெறுவதை உறுதி செய்யவும் மூத்த சட்ட வல்லுநர்களின் ஆலோசனையின் பேரில் உச்சநீதிமன்றத்தை அணுக உத்தரவிடப்பட்டது. இதன் அடிப்படையில், கர்நாடகா உடனடியாகக் காவிரி நீரைத் திறந்துவிட உத்தரவிடக்கோரி மனுத்தாக்கல் செய்யப்பட்டுள்ளது. உச்சநீதிமன்றத்தின் இந்த அவசர தலையீடு தமிழ்நாட்டின் பாசனத் தேவைகளுக்குச் சாதகமான தீர்வைத் தரும் என எதிர்பார்க்கப்படுகிறது.
