தமிழ்நாடு பொது விநியோகத் திட்டத்தின் (PDS) கீழ் போலி குடும்ப அட்டைகளை ஒழிக்கும் வகையிலும், தகுதியான நபர்களுக்கு மட்டுமே அத்தியாவசியப் பொருட்கள் தடையில்லாமல் கிடைப்பதை உறுதி செய்யும் வகையிலும், அனைத்து ரேஷன் கார்டுதாரர்களுக்கும் இ-கேஒய்சி (e-KYC) பயோமெட்ரிக் சரிபார்ப்பைக் கூட்டுறவு மற்றும் உணவுப் பொருள் வழங்கல் துறை கட்டாயமாக்கியுள்ளது. இதனையொட்டி, சென்னையில் உள்ள அனைத்து நியாயவிலை கடைகளிலும் குடும்ப அட்டைதாரர்களுக்கான சிறப்பு e-KYC முகாம்கள் நாளை தீவிரமாக நடைபெறவுள்ளன.
குடும்ப அட்டையில் பெயர் இடம்பெற்றுள்ள உறுப்பினர்கள் அனைவரும் தங்களது கைரேகை (Biometric) அல்லது விழித்திரை (Iris) மூலமாகத் தங்களது விவரங்களை நியாயவிலை கடைகளில் உள்ள இ-போஸ் (e-POS) சாதனங்கள் வழியாகத் தொடர்ந்து உறுதி செய்ய வேண்டும். ஸ்மார்ட் ரேஷன் கார்டில் பதிவு செய்யப்பட்டுள்ள குடும்ப உறுப்பினர்களின் விவரங்கள், ஆதார் தகவல்களுடன் ஒத்துப்போவதை உறுதி செய்வதற்காகவே இந்தத் தணிக்கை நடைமுறை நாடு முழுவதும் முடுக்கிவிடப்பட்டுள்ளது.
நாளை நடைபெறும் இந்தச் சிறப்பு முகாம்களில் பொதுமக்கள் தங்களது ஸ்மார்ட் ரேஷன் கார்டு மற்றும் ஆதார் அட்டையுடன் நேரில் சென்று எவ்விதக் கட்டணமுமின்றி e-KYC நடைமுறையை மிக எளிதாக நிறைவு செய்து கொள்ளலாம். முதியவர்கள், உடல்நலக் குறைவு காரணமாக ரேஷன் கடைக்கு நேரில் வர முடியாத மாற்றுத்திறனாளிகள் ஆகியோருக்குச் சிறப்பு விலக்குகள் மற்றும் மாற்று வழிமுறைகள் மூலம் சரிபார்ப்புப் பணிகளை மேற்கொள்ளத் துறை அதிகாரிகள் நடவடிக்கை எடுத்துள்ளனர்.
குடும்ப அட்டையில் உள்ள தகுதியான உறுப்பினர்களில் யாரேனும் e-KYC செய்யத் தவறினால், அவர்களுக்கான பொருட்கள் தற்காலிகமாக நிறுத்தப்படலாம் அல்லது போலி உறுப்பினர்கள் எனக் கருதிப் பெயர்கள் நீக்கப்படக் கூடும் என்பதால் பொதுமக்கள் இந்தச் வாய்ப்பைப் பயன்படுத்திக் கொள்ளுமாறு கேட்டுக்கொள்ளப்பட்டுள்ளனர். வேலை நிமித்தமாக வெளியூர்களில் வசிப்பவர்கள் கூடத் தங்களுக்கு அருகில் உள்ள எந்தவொரு நியாயவிலைக் கடைக்கும் சென்று இச்சரிபார்ப்பைச் செய்துகொள்ள வசதி செய்யப்பட்டுள்ளதால், சென்னைவாசிகள் தவறாமல் இம்முகாமில் பங்கேற்குமாறு மாவட்ட நிர்வாகம் அறிவுறுத்தியுள்ளது.
