மதுரையில் உள்ள தனிஷ்க் நகைக்கடையில் நடைபெற்ற கொள்ளைச் சம்பவத்தில் முக்கியக் குற்றவாளியாகக் கருதப்படும் 25 வயதான நிஷாந்த் குறித்த புதிய தகவல்கள் காவல்துறை விசாரணையில் தெரியவந்துள்ளன. வீடியோ எடிட்டராகப் பணியாற்றிய நிஷாந்த், தனது இன்ஸ்டாகிராம் பக்கத்தில் முகத்தைக் காட்டாமல் இந்தியா முழுவதும் இருசக்கர வாகனத்தில் பயணம் செய்து வந்ததை போலீசார் கண்டறிந்துள்ளனர்.
ஹெல்மெட் அணிந்தபடியோ அல்லது முகம் தெரியாத கோணங்களிலோ மட்டுமே புகைப்படங்களைப் பதிவிட்டு, தனது அடையாளத்தை அவர் ரகசியமாகவே வைத்திருந்துள்ளார். பல மாநிலங்களுக்குப் பயணம் செய்த அனுபவம் கொண்ட இவர், நகைக்கடை கொள்ளையின் போதும் முகமூடி அணிந்து வந்து நகைகளைத் திருடிச் சென்றுள்ளார்.
இந்த வழக்கில் ஏற்கனவே இன்ஸ்டாகிராம் பிரபலம் மீனாட்சி மற்றும் நிஷாந்தின் தந்தை ஆகிய இருவரும் கைது செய்யப்பட்டுச் சிறையில் அடைக்கப்பட்டுள்ளனர். கடைசியாகத் திருப்பூரில் முன்பின் தெரியாத ஒரு நபரின் செல்போனில் இருந்து மீனாட்சிக்குப் போன் செய்து பேசிய பிறகு, தனது செல்போனை அணைத்துவிட்டு நிஷாந்த் தலைமறைவாகியுள்ளார்.
தலைமறைவாக உள்ள நிஷாந்தைப் பிடிக்க ஒன்பது தனிப்படைகள் அமைக்கப்பட்டுத் தீவிர தேடுதல் வேட்டை நடைபெற்று வருகிறது. அவரது பயணப் பின்னணி மற்றும் தொழில்நுட்பத் தடயங்களைக் கொண்டு காவல்துறையினர் அடுத்தகட்ட விசாரணைகளை முடுக்கிவிட்டுள்ளனர்.
