தமிழ்நாடு சட்டமன்றத்தில் ஆகஸ்ட் 6-ஆம் தேதி 2026-2027 நிதியாண்டிற்கான வேளாண்மை நிதிநிலை அறிக்கை (Agri Budget) தாக்கல் செய்யப்படவுள்ள நிலையில், தமிழக வேளாண்மை மற்றும் உழவர் நலத்துறை அமைச்சர் ஆர். வினோத், பட்ஜெட் வரைவு நகலுடன் ஆந்திர மாநிலம் திருப்பதி ஏழுமலையான் கோவிலுக்குச் சென்று சாமி தரிசனம் செய்தது அரசியல் களம் மற்றும் சமூக வலைதளங்களில் பெரும் விவாதப் புயலைக் கிளப்பியுள்ளது.
முதலமைச்சர் ச. ஜோசப் விஜய் தலைமையிலான தமிழக வெற்றிக் கழக (தவெக) அரசின் முதல் பட்ஜெட் கூட்டத்தொடர் ஆகஸ்ட் 5-ஆம் தேதி தொடங்குகிறது. அன்றைய தினம் நிதி அமைச்சர் மரிய வில்சன் பொது பட்ஜெட்டைத் தாக்கல் செய்யவுள்ள நிலையில், மறுநாள் (ஆகஸ்ட் 6) வேளாண் பட்ஜெட் தாக்கல் செய்யப்படுகிறது. இதனையொட்டி திருப்பதி திருமலைக்குச் சென்ற அமைச்சர் வினோத், ஏழுமலையான் சந்நிதியில் வேளாண் பட்ஜெட் ஆவணங்களை வைத்துச் சிறப்புப் பூஜை செய்து வழிபட்ட பின் செய்தியாளர்களிடம் பேசுகையில், “விவசாயிகளின் நலனுக்கான நிதிநிலை அறிக்கை சிறப்பாக அமைய இறைவனின் அருளைப் பெற வந்துள்ளோம்” எனத் தெரிவித்தார்.
அமைச்சரின் இந்தச் செயல் மதச் சார்பின்மை மற்றும் அரசியலமைப்பு நெறிமுறைகளுக்கு எதிரானது என பல்வேறு அரசியல் கட்சித் தலைவர்களும் சமூக ஆர்வலர்களும் கடுமையான விமர்சனங்களை முன்வைத்து வருகின்றனர். இது குறித்துக் கருத்து தெரிவித்துள்ள மார்க்சிஸ்ட் கம்யூனிஸ்ட் கட்சியின் மதுரை தொகுதி நாடாளுமன்ற உறுப்பினர் சு. வெங்கடேசன், “பட்ஜெட் ஆவணங்கள் என்பது கடவுளுக்குச் செய்யப்படும் ஆன்மீகப் பண்டங்களோ அல்லது காணிக்கைகளோ அல்ல; அவை மக்களின் வரிப்பணம் எவ்வாறு செலவிடப்பட வேண்டும் என்பதை விளக்கும் புனிதமான அரசியலமைப்பு ஆவணங்கள். ஒரு தனிநபரின் சொந்த ஆன்மீக நம்பிக்கைகளுக்காக அரசாங்க ஆவணங்களைக் கோவிலில் வைப்பது அரசியலமைப்பு ரீதியாக முறையற்றது” எனக் சாடியுள்ளார்.
அதேபோல, ‘பூவுலகின் நண்பர்கள்’ அமைப்பைச் சேர்ந்த சுற்றச்சூழல் ஆர்வலர் ஜி. சுந்தரராஜன் உள்ளிட்டோரும், “டெல்டா மாவட்டங்களில் போதிய நீரின்றி விவசாயிகள் தவித்து வரும் சூழலில், கள ஆய்வுகளை விடுத்து பட்ஜெட் நகலைத் திருப்பதிக்குக் கொண்டு சென்றது அரசமைப்பு சார்ந்த மதச்சார்பின்மைக்கு உகந்ததா?” என வினா எழுப்பியுள்ளனர். இருப்பினும், அரசின் நல்லெண்ண நடவடிக்கையை தேவையின்றி அரசியலாக்கக் கூடாது என தவெக ஆதரவாளர்கள் இணையத்தில் முரண்பட்ட கருத்துக்களைப் பதிவிட்டு வருவதால், இச்சம்பவம் டிஜிட்டல் தளங்களில் பெரும் பேசுபொருளாக மாறியுள்ளது.
