தமிழக வெற்றி கழகத்தின் (தவெக) தேர்தல் செலவினக் கணக்குகள் இந்தியத் தேர்தல் ஆணையத்திடம் தாக்கல் செய்யப்பட்டுள்ள நிலையில், அக்கட்சி ஒட்டுமொத்தமாக ரூ.19.81 கோடி செலவிட்டுள்ளதாகவும், அதில் தவெக தலைவர் விஜய்யின் பிரச்சாரப் பயணங்களுக்காக மட்டும் ரூ.3.55 கோடிக்கும் மேல் செலவிடப்பட்டுள்ளதாகவும் தகவல்கள் வெளியாகிப் பரபரப்பை ஏற்படுத்தியுள்ளன.
தேர்தல் நெறிமுறைகளின்படி, அங்கீகரிக்கப்பட்ட மற்றும் பதிவு செய்யப்பட்ட அரசியல் கட்சிகள் தேர்தல் முடிந்து குறிப்பிட்ட காலத்திற்குள் தங்களின் பிரச்சாரச் செலவுகள், தேர்தல் நிதிகள் மற்றும் வேட்பாளர்களுக்கான நிதி ஒதுக்கீடு குறித்த முழுமையான தணிக்கை அறிக்கையைத் தேர்தல் ஆணையத்திடம் சமர்ப்பிக்க வேண்டும். அந்த வகையில் தமிழக வெற்றி கழகம் சான்றளிக்கப்பட்ட கணக்கு அறிக்கையைத் தாக்கல் செய்துள்ளது.
வெளியாகியுள்ள தணிக்கை அறிக்கையின்படி, பொதுக்கூட்டங்கள், பிரம்மாண்ட மேடைகள் மற்றும் பிரச்சாரப் பேரணிகளுக்காக அதிகபட்சமாக ரூ.10 கோடிக்கும் அதிகமாகச் செலவிடப்பட்டுள்ளது. இதில் முக்கிய அம்சமாக, மாநிலம் முழுவதும் தீவிரப் பிரச்சாரத்தில் ஈடுபட்ட தவெக தலைவர் விஜய்யின் ஹெலிகாப்டர் மற்றும் தனி விமானப் பயணங்களுக்காக மட்டும் ரூ.3.55 கோடி வரை செலவு செய்யப்பட்டுள்ளதாகக் குறிப்பிடப்பட்டுள்ளது.
மேலும், வேட்பாளர்களுக்கான நிதி உதவி, விளம்பரங்கள், சமூக வலைதளப் பிரச்சாரங்கள் மற்றும் தகவல் தொடர்பு சாதனங்களுக்காக எஞ்சிய தொகைகள் பயன்படுத்தப்பட்டுள்ளன. புதியதாகத் தொடங்கப்பட்ட ஒரு கட்சி குறுகிய காலத்தில் தாக்கல் செய்துள்ள இந்தத் தேர்தல் செலவினக் கணக்கு விவரங்கள் தமிழக அரசியல் வட்டாரங்களிலும், சமூக வலைதளங்களிலும் தற்போது பெரும் விவாதப் பொருளாக மாறியுள்ளன.
