தமிழக முதலமைச்சர் சி. ஜோசப் விஜய்யின் பிறந்தநாளை முன்னிட்டு திருச்சி மாவட்டம் மணப்பாறையில் நடைபெற்ற தவெக மருத்துவ முகாம் மற்றும் ரத்ததான முகாம்களைத் துவக்கி வைத்துப் பார்வையிட்ட பின், இந்து சமய அறநிலையத்துறை மற்றும் திருச்சி மாவட்ட பொறுப்பு அமைச்சர் எஸ். ரமேஷ் செய்தியாளர்களைச் சந்தித்தார். அப்போது, கடந்த சில நாட்களாக திருச்சியில் திமுகவினர் திட்டமிட்டுத் தன் மீது நடத்தி வரும் அவதூறு பிரச்சாரங்களுக்குப் புகைப்படங்கள் மற்றும் மக்கள் எழுதிய நன்றி கடிதங்கள் அடங்கிய கோப்புகளை ஆதாரமாகக் காட்டி அவர் ஆவேசமாகப் பதிலடி கொடுத்தார்.
“திருச்சியைத் தங்களின் சொந்தக் கோட்டை என்று நினைத்துக் கொண்டிருந்தவர்கள், இன்று அது தளபதி விஜய்யின் கோட்டையாக மாறிவிட்டதை ஜீரணிக்க முடியாமல் அலறுகிறார்கள்” என்று சாடிய அமைச்சர் ரமேஷ், ‘ஸ்ரீரங்கம் எம்எல்ஏவை காணவில்லை’, ‘அமைச்சர் ரமேஷை காணவில்லை’ என திமுகவினர் பரப்பி வரும் டார்கெட்டட் கேம்பெயின் (Targeted Campaign) முற்றிலும் பொய்யானது என்றார். தான் தொகுதிக்குள் இருந்தாலும் இல்லாவிட்டாலும், தனது எம்எல்ஏ அலுவலக அதிகாரிகள் மற்றும் கழகத் தோழர்கள் மூலம் கடந்த ஒரு மாதத்தில் மட்டும் குடிநீர் தொட்டி, கழிப்பறை வசதி உள்ளிட்ட மக்களின் அனைத்துப் பிரச்சினைகளும் உடனடியாகத் தீர்க்கப்பட்டு, அதற்கு மக்கள் நேரில் எழுதிய நன்றி கடிதங்களே இதற்கு சாட்சி என அவர் அடுக்கடுக்கான ஆதாரங்களை மேடையில் சமர்ப்பித்தார்.
மேலும், “அமைச்சர் போன் எடுப்பதில்லை” என்ற குற்றச்சாட்டை மறுத்த அவர், தனது அலுவலகத்தில் நாள்தோறும் வரும் பொதுமக்களின் அழைப்புகள் மற்றும் புகார்களைப் பதிவு செய்யும் முறையான பதிவேட்டைச் செய்தியாளர்களிடம் காண்பித்தார். திமுகவினரின் இத்தகைய வெற்றுப் பிரச்சாரங்களால் தவெக அரசுக்கோ அல்லது தன் பதவிக்கோ எந்தப் பாதிப்பும் இல்லை என்று குறிப்பிட்ட அவர், “மக்களால் தேர்ந்தெடுக்கப்பட்ட இந்த பதவியில் நாங்கள் இரண்டு நாட்கள் இருந்தாலும், மக்களுக்காக உயிரைக் கொடுத்துச் சேவகனாக வேலை செய்வோம். எங்களை உங்களால் ஒன்றும் செய்ய முடியாது; இந்த வீண் பொய் பிரச்சாரங்களுக்குப் பதிலாக நீங்கள் வெற்றி பெற்றுள்ள தொகுதிகளில் மக்களுக்கு நல்லது செய்ய முயற்சி செய்யுங்கள்” என்று திமுகவிற்குத் திறந்த சவால் விடுத்தார்.
சட்டமன்றத்தில் திமுக தலைவர் மு.க.ஸ்டாலின் தவெக அரசை விமர்சிப்பது குறித்த கேள்விக்கு, “சட்டமன்றத்தில் இருந்து எங்களைப் பேசவிடாமல் செய்தவர்களை இன்று மக்கள் வீட்டில் உட்கார வைத்து, லைவ் டிவியில் எங்களது சாதனை நிகழ்வுகளைப் பார்க்க வைத்துள்ளனர்; அந்த ஏமாற்றத்தில் தான் ஸ்டாலின் இப்படிப் பேசுகிறார்” என்று விமர்சித்தார். தொடர்ந்து பேசிய அவர், முந்தைய ஆட்சியின் நிர்வாகச் சீர்கேடுகளைச் சீரமைக்கக் காலம் எடுக்கும் என்றும், தற்போதைக்குத் திருச்செந்தூர் முருகன் கோயிலில் மொபைல் போன் பயன்பாடு தடை செய்யப்பட்டுள்ளது போல, அடுத்த 3 மாதங்களில் அனைத்து முக்கியக் கோயில்களிலும் வெளிப்படையான ஆன்லைன் ஆன்மீகத் தரிசன முன்பதிவு (Online Ticket Booking) மற்றும் பக்தர்களுக்கான தங்குமிடம், கழிப்பறை போன்ற உள்கட்டமைப்பு வசதிகள் புதிய திட்டங்கள் மூலம் மேம்படுத்தப்படும் என்றும் அமைச்சர் ரமேஷ் உறுதியளித்தார்.
