தமிழக சட்டமன்றக் கூட்டத்தொடரில் இன்று இந்து சமய அறநிலையத்துறை மானியக் கோரிக்கை மீதான விவாதத்தின் போது, முன்னாள் அமைச்சர் சேகர்பாபு மற்றும் தற்போதைய அறநிலையத்துறை அமைச்சர் ரமேஷ் ஆகியோருக்கு இடையே கடுமையான வாக்குவாதமும், காரசாரமான விவாதமும் அரங்கேறியது. முந்தைய திமுக ஆட்சிக்காலத்தில் அறிவிக்கப்பட்டு, தற்போது தமிழக வெற்றிக் கழக (தவெக) அரசால் நிறுத்தப்பட்ட திருமண மண்டபங்கள் மற்றும் வணிக வளாகப் பணிகள் குறித்து இருதரப்பும் நேருக்கு நேர் மோதிக்கொண்டன. கோவில்களின் வருமானம் மற்றும் நிதியானது முழுக்க முழுக்கக் கோவில்களின் ஆன்மீகப் பணிகளுக்கும், அங்கு வரும் பக்தர்களின் தங்குமிடம், கழிப்பறை உள்ளிட்ட அடிப்படை வசதிகளை மேம்படுத்துவதற்கும் மட்டுமே பயன்படுத்தப்பட வேண்டும் என்ற தற்போதைய அரசின் கொள்கை முடிவை அமைச்சர் ரமேஷ் அவையில் திட்டவட்டமாக முன்வைத்தார்.
முந்தைய ஆட்சியில் ஆன்மீக நோக்கத்தைத் தாண்டி, கோவில்களை வணிகமயமாக்கும் நோக்கில் கமர்சியல் திட்டங்களுக்கு முக்கியத்துவம் கொடுக்கப்பட்டதாக அமைச்சர் ரமேஷ் அடுக்கடுக்கான குற்றச்சாட்டுகளைச் சாட்டினார். அதற்கு உதாரணமாக நீலகிரி மாவட்டம், குன்னூரில் உள்ள அருள்மிகு விநாயகர் திருக்கோவிலைச் சுட்டிக்காட்டிய அவர், “மாதத்திற்குச் சராசரியாக 500 பக்தர்கள் மட்டுமே வரக்கூடிய, ஒரு கழிப்பறை வசதி கூட இல்லாத அந்தச் சிறிய கோவிலின் நிதியிலிருந்து 10 கோடி ரூபாயை எடுத்து ‘மல்டி லெவல் கார் பார்க்கிங்’ அமைக்க முந்தைய அரசு திட்டமிட்டிருந்தது. குன்னூர் மற்றும் உதகையைச் சுற்றியுள்ள 50-க்கும் மேற்பட்ட கோவில்களில் அடிப்படை வசதிகளே இல்லாத போது, கோவில் நிதியை இப்படி கமர்சியலாகப் பயன்படுத்துவதை ஏற்க முடியாது என்பதால் தான் இத்திட்டங்களை ரத்து செய்து, மாற்றுத் திட்டங்களை உருவாக்க அரசாணை வெளியிட்டுள்ளோம்” என்று அதிரடியாக விளக்கமளித்தார்.
அமைச்சரின் இந்தக் குற்றச்சாட்டுக்கு உடனடியாகப் பதிலடி கொடுத்துப் பேசிய முன்னாள் அறநிலையத்துறை அமைச்சர் சேகர்பாபு, இந்தத் திட்டங்கள் அனைத்தும் சட்டவிதிகளுக்கு உட்பட்டும், அன்றைய காலகட்ட சட்டமன்ற உறுப்பினர்களின் கோரிக்கைக்கு இணங்கவுமே கொண்டு வரப்பட்டதாகக் குறிப்பிட்டார். மேலும் குன்னூர் கார் பார்க்கிங் திட்டம் குறித்து விளக்கிய அவர், “குன்னூர் மற்றும் ஊட்டி பகுதியில் உள்ள 56 கோவில்களுக்கும் நான் நேரடியாகச் சென்று 5 நாட்கள் முகாமிட்டு ஆய்வு நடத்தினேன். அங்கு வரும் சுற்றுலாப் பயணிகளின் வாகனங்களை நிறுத்தப் போதிய இடமில்லாமல் தவிப்பதை உணர்ந்து, நகராட்சியின் பரிந்துரையின் பேரிலேயே இந்த மல்டி லெவல் கார் பார்க்கிங் திட்டம் கொண்டு வரப்பட்டது. இதன் மூலம் வரும் வருவாயைக் கொண்டு அந்தத் திருக்கோவில்களின் உள்கட்டமைப்பை மேம்படுத்த முடியும் என்ற நோக்கில்தான் இது செயல்படுத்தப்பட்டது” என்று வாதாடினார். மேலும், அன்று இந்தத் திட்டத்திற்கு ஒப்புதல் அளித்து அரசாணை வெளியிட்ட அதே ஆணையர்தான், இன்று தற்போதைய அமைச்சருக்கும் வழிகாட்டியாக உள்ளார் என்பதையும் சேகர்பாபு சுட்டிக்காட்டினார்.
முன்னாள் அமைச்சரின் இந்த வாதத்திற்குப் பதிலளித்து இறுதி உரையாற்றிய அமைச்சர் ரமேஷ், “நகராட்சி நிர்வாகத்திற்குத் தேவையான கார் பார்க்கிங் வசதிக்குக் கோவிலுக்குச் சொந்தமான நிலத்தைக் குத்தகைக்குக் கொடுத்து, அதன் மூலம் வரும் வருவாயை வேண்டுமானால் கோவில் மேம்பாட்டிற்குப் பயன்படுத்தியிருக்கலாம். அதை விடுத்துப் பக்தர்கள் யாரும் கேட்காத ஒரு கமர்சியல் திட்டத்திற்கு, நேரடியாகக் கோவில் நிதியிலிருந்து 10 கோடி ரூபாயை அள்ளிக் கொடுப்பது முறையல்ல. பக்தர்கள் எதிர்பார்ப்பதெல்லாம் கோவிலுக்குள் சென்று மனநிறைவோடு தரிசனம் செய்துவிட்டு வரத் தேவையான தூய்மையான மற்றும் அடிப்படை வசதிகளைத்தான். முதலமைச்சர் விஜய் தலைமையிலான தவெக அரசு, மக்களின் ஆன்மீக நம்பிக்கையையும் கோவில் நிதியையும் ஒருபோதும் கமர்சியலாகப் பயன்படுத்த அனுமதிக்காது” என்று கூறி விவாதத்திற்கு முற்றுப்புள்ளி வைத்தார். இவர்களது இந்த நேரடி மோதலால் சட்டப்பேரவை வளாகம் இன்று பெரும் பரபரப்புடன் காணப்பட்டது.
